Ишек тупсасы

Category: Poetry
Ишегеңә синең кагылдым...
Бәсле иде аның тоткасы.
Шакыдым да, көтәм... Йөрәгем
туктый икән, әйдә, туктасын.

һәм ачылды авыр ишегең,
ыңгырашып куйды, сызланып.
— Кайда йөрисең син югалып -
бетә яздым инде бозланып...

Язмыш аты шулай йөретә —
югалырга исәп юк та соң...
Ыңгырашмас бүтән, сызланмас,
уттай кызар ишек тупсасы...

Available translations:

Tatarish (Original)