Яманлыйбыз якты көнне
очраганы беренә —
яктылыгы аның безгә
артык сәер күренә.
Яманлыйбыз кара төнне:
артык кара тоела,
җанга фәкать кара төннән
кара корым коела...
Ә үзебез көндез — төнне,
төнлә — көнне көтәбез.
Кояш Айны алыштыра...
Икесен дә тетәбез.
Менә шундый кешеләр без —
җаныбызда ят орлык
тамыр җәйгән, чәчәк ата
үтә сәер матурлык...
Хурлый-хурлый сокланабыз,
елый-елый көләбез...
Шайтан алгыры, шулай да
матур яши беләбез!